വൈദ്യുതി പോസ്റ്റുകളിൽ ഇവി ചാര്‍ജിങ് സ്റ്റേഷൻ; വരുമാനവും നേടാം

 

കെഎസ്ബിയുടെ വൈദ്യുതി പോസ്റ്റുകളിൽ നിന്ന് ഇലക്ട്രിക് വാഹനങ്ങൾ ചാര്‍ജ് ചെയ്യാം. പോൾ മൗണ്ടഡ് ചാര്‍ജിങ് സ്റ്റേഷനുകൾ സ്ഥാപിക്കുന്നതിനായി ടെൻഡര്‍ ക്ഷണിച്ച് കെഎസ്ഇബി. 

 
കെഎസ്ഇബിയുടെ വൈദ്യുതി പോസ്റ്റുകളിൽ ത്രീ വീലർ, ടൂ വീലർചാർജിങ് സ്റ്റേഷനുകൾ സ്ഥാപിക്കുന്നു. പുതിയ പദ്ധതിയുടെ ഭാഗമായി 1, 140 പോൾ മൗണ്ടഡ് ചാർജിങ് സ്റ്റേഷനുകൾ നിർമ്മിക്കുന്നതിനായി ഇ- ടെൻഡർക്ഷണിച്ചു. ടെൻഡർ സമർപ്പിക്കുന്നതിനുള്ള അവസാന തിയതി നവംബര്‍ 26-ാം തിയതി വരെയാണ്.
നിലവിലുള്ള പോസ്റ്റിൽ തന്നെ ചാർജിങ് സ്റ്റേഷനുകൾ സ്ഥാപിക്കുന്നത് വഴി ചെലവ് കുറയ്‌ക്കാനാകും എന്നാണ് വിലയിരുത്തൽ. കുറഞ്ഞനിരക്കിൽ ഓട്ടോറിക്ഷകൾക്കും സ്‌കൂട്ടറുകൾക്കും ഒക്കെ ചാര്‍ജിങ് സേവനങ്ങൾ ലഭ്യമാക്കാനും പദ്ധതി സഹായകരമാകും. റോഡരികിലും പാർക്കിങ് ഏരിയയിലും പൊതുസ്ഥലങ്ങളിലുമാണ് ഇത്തരം പോൾ മൗണ്ട് സ്റ്റേഷനുകൾ സ്ഥാപിക്കുക എന്നാണ് റിപ്പോര്‍ട്ടുകൾ. ഇലക്‌ട്രിക് ഓട്ടോ, സ്‌കൂട്ടർ എന്നിവ സൗകര്യപ്രദമായി ചാർജ് ചെയ്യാനും സംവിധാനത്തിലൂടെ കഴിയും. ചാർജ് ചെയ്ത ശേഷം തുക മൊബൈൽ ആപ്പ് വഴി വഴി ക്യുആർ കോഡ് സ്‌കാൻ ചെയ്‌ത് വളരെ ലളിതമായി അടയ്‌ക്കാനാകും. പ്രീപെയ്ഡ് സംവിധാനമാണ് ഇതിനായി ഉപയോഗിക്കുന്നത്.

ആദ്യ ഘട്ടമായി കോഴിക്കോട് 10 ചാര്‍ജിങ് സ്റ്റേഷനുകൾ സ്ഥാപിച്ചിരുന്നു. കേരളം മുഴുവൻ പദ്ധതി വ്യാപിപ്പിക്കുന്നതിൻെറ ഭാഗമായി 1000 ചാര്‍ജിങ് സ്റ്റേഷനുകൾ സ്ഥാപിച്ചേക്കും എന്ന് റിപ്പോര്‍ട്ടുകൾ ഉണ്ടായിരുന്നു.

സ്റ്റേഷനുകൾ കേരളത്തിലുടനീളം സ്ഥാപിക്കാനും കമ്മീഷൻ ചെയ്യുന്നതിനുമാണ് കരാര്‍ ക്ഷണിച്ചിരിക്കുന്നത്. ടെൻഡര്‍ ഐഡിക്കായി ഈ ലിങ്കിൽ ക്ലിക്ക് ചെയ്യാം. https://bit.ly/30TtCIu . ഒരു ലക്ഷം രൂപയാണ് ഇതിനായി നിക്ഷേിക്കേണ്ട തുക. ബിഡിനായുള്ള പ്രോസസിങ് നിരക്ക് തിരിച്ചു കിട്ടില്ല. 8,850 രൂപയാണ് പ്രോസസിങ് ഫീസ് ഇനത്തിൽ ഈടാക്കുക. 7500 രൂപയാണ് ഫീസ് എങ്കിലും 18 ശതമാനം ജിഎസ്‍ടി ഉൾപ്പെടെയാണിത്. കരാര്‍ കാലവധി മുതൽ ആറു മാസത്തേക്കായിരിക്കും കരാറിന് സാധുത.

നവംബര്‍ 30 മുതൽ ലേല നടപടികൾ തുടങ്ങിയേക്കും. കെഎസ്ഇബി വെബ്സൈറ്റിലും ടെൻഡര്‍ സംബന്ധിച്ച കൂടുതൽ വിവരങ്ങൾ ലഭ്യമാകും. അതേസമയം യാതൊരു കാരണവും കൂടാതെ ലേല നടപടികൾ റദ്ദു ചെയ്യാൻ കെഎസ്ഇബിക്ക് അധികാരം ഉണ്ടായിരിക്കും. തിരുവനന്തപുരത്തെ നാഷണൽ ഇൻഫോമാറ്റിക്സ് സെൻറര്‍, റെന്യൂവബ്ൾ എനര്‍ജി ആൻഡ് എനര്‍ജി സേവിങ്സ് ചീഫ് എഞ്ചിനിയറുടെ കാര്യാലയം എന്നിവിടങ്ങളിൽ നിന്നും കൂടുതൽ വിവരങ്ങൾ ശേഖരിക്കാം.











أحدث أقدم